திரு நெய்த்தானம்

         

௨ 

திருஞானசம்பந்தர்  சுவாமிகள்   அருளிச்செய்த
இரண்டாம் திருமுறை 

தகவல் பலகை	விவரம்
தலம்	திரு நெய்த்தானம்
பிற பெயர்கள்
நாடு	சோழ நாடு (வ)
ॐசுவாமி	நெய்யாடியப்பர்
ॐஅம்பிகை	பாலாம்பிகை
பாடியவர்கள்	சம்பந்தர் (1)          மையாடிய கண்டன் (1-15) அப்பர் (5)          காலனை வீழச் செற்ற (4-37)           பாரிடம் சாடிய பல்லுயிர் (4-89)           கொல்லியான் (5-34)           வாகைஎல்லாம் உடைய (6-41)           மெயத்தானத்து அகம் படியுள் (6-42)
ஸ்தல மரம்	புன்னை
தீர்த்தம்	காவிரி
பண்	நட்டபாடை
குறிப்புகள்	திருவையாறுக்கு அண்மையில் உள்ளது.  ஏழூர் திருத்தலங்களில் ஒன்று. தில்லை ஸ்தானம் என வழங்கப்படுகிறது
பதிக பலன்	சிவனடி பொருந்தி வாழ்வார்கள்
வரிசை எண்.	15                                                     52/63

திருச்சிற்றம்பலம் 

மையாடிய கண்டன்மலை 
மகள்பாகம் அது உடையான்
கையாடிய கேடில்கரி 
உரிமூடிய ஒருவன்
செய் ஆடிய குவளைம்மலர் 
நயனத்தவளோடும்
நெய் ஆடிய பெருமானிடம் 
நெய்த்தானம் எனீரே.  1

பறையும்பழி பாவம்படு 
துயரம்பல தீரும்
பிறையும்புனல் அரவும்படு 
சடை எம்பெரு மான் ஊர்
அறையும்புனல் வருகாவிரி 
அலைசேர்வட கரைமேல்
நிறையும்புனை மடவார்பயில் 
நெய்த்தானம் எனீரே.  2

பேய் ஆயின பாடப்பெரு 
நடம் ஆடிய பெருமான்
வேய் ஆயின தோளிக்குக் ஒரு 
பாகம்மிக வுடையான்
தாயாகிய உலகங்களை 
நிலைபேறுசெய் தலைவன்
நேய் ஆடிய பெருமானிடம் 
நெய்த்தானம் எனீரே.  3

சுடுநீறு அணி அண்ணல்சுடர் 
சூலம் அனல் ஏந்தி
நடுநள் இருள் நடமாடிய 
நம்பன் உறை இடமாம்
கடுவாள் இள அரவாடு உமிழ் 
கடல்நஞ்சம் அது உண்டான்
நெடுவாளைகள் குதிகொள் உயர் 
நெய்த்தானம் எனீரே. 4

நுகர் ஆரமொடு ஏலம்மணி 
செம்பொன் நுரை உந்திப்
பகராவரு புனல் காவிரி 
பரவிப்பணிந்து ஏத்தும்
நிகரால் மணல் இடுதன்கரை 
நிகழ்வாய நெய்த்தான
நகரான் அடியேத்தம் நமை 
நடலை அடையாவே.  5

விடையார்கொடி உடையவ்வணல் 
வீந்தார்வெளை எலும்பும்
உடையார்நறு மாலைசடை 
உடையார் அவர் மேய
புடையேபுனல் பாயும்வயல் 
பொழில்சூழ்ந்தநெய்த் தானம்
அடையாதவர் என்றும்அமர் 
உலகம் அடையாரே.  6

நிழலார்வயல் கமழ்சோலைகள் 
நிறைகின்றநெய்த் தானத்
தழல் ஆனவன் அனல் அங்கையில்
ஏந்தி அழகாய
கழலான் அடி நாளும் கழ 
லாதேவிட லின்றித்
தொழலார் அவர் நாளும் துயர்
இன்றித் தொழுவாரே.  7

அறையார்கடல் இலங்கைக்கு இறை 
அணிசேர் கயிலாயம்
இறையாரமுன் எடுத்தான் 
இருபதுதோள் இற ஊன்றி
நிறையார் புனல் நெய்த்தானன் நன் 
நிகழ்சேவடி பரவக்
கறையார் கதிர் வாள் ஈந்தவர் 
கழல் ஏத்துதல் கதியே.  8

கோலம்முடி நெடுமாலொடு 
கொய்தாமரை யானும்
சீலம்மறி வரிதாய்ஒளி 
திகழ்வாய நெய்த் தானம்
காலம்பெற மலர்நீர் அவை 
தூவித்தொழுது ஏத்தும்
ஞாலம்புகழ் அடியார் உடல் 
உறுநோய்நலி யாவே.  9

மத்தம் மலி சித்தத்து இறை 
மதி இல்லவர் சமணர்
புத்தர் அவர் சொன்னம்மொழி 
பொருளாநினை யேன்மின்
நித்தம்பயில் நிமலன் துறை 
நெய்த்தானம் அது ஏத்தும்
சித்தம் உடை  அடியார் உடல் 
செறுநோயடை யாவே.  10

தலமல்கிய புனல் காழியுள் 
        தமிழ்ஞானசம் பந்தன்
நிலமல்கிய புகழான்மிகு 
        நெய்த்தானனை நிகரில்
பலமல்கிய பாடல் இவை 
        பத்தும்மிக வல்லார்
சிலமல்கிய செல்வன்  
        அடி சேர்வர் சிவகதியே.

திருச்சிற்றம்பலம்