திரு நெய்த்தானம்

              

௨ 

திருநாவுக்கரசர்  சுவாமிகள்   அருளிச்செய்த
ஐந்தாம்  திருமுறை 

தகவல் பலகை	விவரம்
தலம்	திரு நெய்த்தானம்
பிற பெயர்கள்
நாடு	சோழ நாடு (வ)
ॐசுவாமி	நெய்யாடியப்பர்
ॐஅம்பிகை	பாலாம்பிகை
பாடியவர்கள்	சம்பந்தர் (1)          மையாடிய கண்டன் (1-15) அப்பர் (5)          காலனை வீழச் செற்ற (4-37)           பாரிடம் சாடிய பல்லுயிர் (4-89)           கொல்லியான் (5-34)           வாகைஎல்லாம் உடைய (6-41)           மெயத்தானத்து அகம் படியுள் (6-42)
ஸ்தல மரம்	புன்னை
தீர்த்தம்	காவிரி
பண்	திரு குறுந்தொகை
குறிப்புகள்	திருவையாறுக்கு அண்மையில் உள்ளது.  ஏழூர் திருத்தலங்களில் ஒன்று. தில்லை ஸ்தானம் என வழங்கப்படுகிறது
பதிக பலன்	வினை நீங்கும்.
வரிசை எண்.	34                                                     52/63

திருச்சிற்றம்பலம் 

மெய்த்தானத்து அகம்படியுள் ஐவர் நின்று
வேண்டிற்றுக் குறைமுடித்து வினைக்குக்கூடாம்
இத்தானத் திருந்திங்ங னுய்வான் எண்ணும்
இதனை ஒழி இயம்பக்கேள் ஏழை நெஞ்சே
மைத்தான நீள்நயனி பங்கன் வங்கம்
வருதிரைநீர் நஞ்சுண்ட கண்டன் மேய
நெய்த்தான நன்னகர் என்று ஏத்தி நின்று
நினையுமா நினைந்தக்கால் உய்ய லாமே.  1

ஈண்டா விரும்பிறவித் துறவா ஆக்கை
இதுநீங்க லாம்விதி உண்டு என்று சொல்ல
வேண்டாவே நெஞ்சமே விளம்பக் கேள்நீ
விண்ணவர்தம் பெருமானார் மண்ணில் என்னை
ஆண்டானன் றருவரையாற் புரமூன் றெய்த
அம்மானை அரிஅயனும் காணா வண்ணம்
நீண்டான் உறைதுறைநெய்த் தானம் என்று
நினையுமா நினைந்தக்கால் உய்ய லாமே.  2

பரவிப் பலபலவும் தேடி ஓடிப்
பாழாங் குரம்பையிடைக் கிடந்து வாளா
குரவிக் குடிவாழ்க்கை வாழ வெண்ணிக்
குலைகை தவிர்நெஞ்சே கூறக் கேள்நீ
இரவிக் குலமுதலா வானோர் கூடி
எண்ணிறந்த கோடி யமர ராயம்
நிரவிக் கரியவன்நெய்த் தானம் என்று
நினையுமா நினைந்தக்கால் உய்ய லாமே.  3

அலையார் வினைத்திறஞ்சேர் ஆக்கை உள்ளே
அகப்பட்டுள் ஆசை எனும் பாசம் தன்னுள்
தலையாய்க் கடையாகும் வாழ்வில் ஆழ்ந்து
தளர்ந்துமிக நெஞ்சமே அஞ்ச வேண்டா
இலையார் புனக்கொன்றை எறிநீர்த் திங்கள்
இருஞ்சடைமேல் வைத்து உகந்தான் இமையோர் ஏத்தும்
நிலையான் உறைநிறைநெய்த் தானம் என்று
நினையுமா நினைந்தக்கால் உய்ய லாமே.  4

தினைத்தனையோர் பொறையிலா உயிர்போங் கூட்டைப்
பொருள் என்று மிகவுன்னி மதியால் இந்த
அனைத்துலகும் ஆளலாம் என்று பேசும்
ஆங்காரம்  தவிர்நெஞ்சே  அமரர்க் காக
முனைத்துவரு மதில்மூன்றும் பொன்ற அன்று
முடுகியவெஞ் சிலைவளைத்துச் செந்தீ மூழ்க
நினைத்தபெருங் கருணையன் நெய்த்தானம் என்று
நினையுமா நினைந்தக்கால் உய்ய லாமே.  5

மிறைபடும் இவ்வுடல் வாழ்வை மெய் என்று எண்ணி
வினையிலே கிடந்து அழுந்தி வியவேல் நெஞ்சே
குறை உடையார் மனத்துளான் குமரன் தாதை
கூத்தாடும் குணமுடையான் கொலைவேற் கையான்
அறைகழலும் திருவடிமேற் சிலம்பும் ஆர்ப்ப
அவனிதலம் பெயரவரு நட்டம் நின்ற
நிறைவுடையான் இடமாம் நெய்த்தானம் என்று
நினையுமா நினைந்தக்கால் உய்ய லாமே.  6

பேசப் பொருளலாப் பிறவி தன்னைப்
பெரிது என்று உன் சிறுமனத்தால் வேண்டி ஈண்டு
வாசக் குழல்மடவார் போகம் என்னும்
வலைப்பட்டு வீழாதே வருக நெஞ்சே
தூசக் கரி உரித்தான் தூநீ றாடித்
துதைந்து இலங்கு நூல்மார்பன் தொடர கில்லா
நீசர்க்கு அரியவன் நெய்த்தானம் என்று
நினையுமா நினைந்தக்கால் உய்ய லாமே.  7

அஞ்சப் புலன் இவற்றால் ஆட்ட வாட்டு
உண்டருநோய்க்கு இடமாய உடலின் தன்மை
தஞ்சம் எனக்கருதித் தாழேல் நெஞ்சே
தாழக் கருதுதியே தன்னைச் சேரா
வஞ்ச மனத்தவர்கள் காண ஒண்ணா
மணிகண்டன் வானவர்தம் பிரான் என்று ஏத்தும்
நெஞ்சர்க்கு இனியவன் நெய்த்தானம் என்று
நினையுமா நினைந்தக்கால் உய்யலாமே.  8

பொருந்தாத உடல் அகத்தில் புக்க ஆவி
போமாறு அறிந்தறிந்தே புலைவாழ்வுன்னி
இருந்தாங் கிடர்ப்படநீ வேண்டா நெஞ்சே
யிமையவர்தம் பெருமானன் றுமையா ளஞ்சக்
கருந்தாள் மதகரியை வெருவச் சீறும்
கண்ணுதல்கண் டமராடி கருதார் வேள்வி
நிரந்தரமா இனிதுறைநெய்த் தானம் என்று
நினையுமா நினைந்தக்கால் உய்ய லாமே.  9

உரித்தன்று உனக்கு இவ் வுடலின் தன்மை
உண்மை உரைத்தேன் விரதம் எல்லாம்
தரித்தும் தவமுயன்றும் வாழா நெஞ்சே
தம்மிடையில் இல்லார்க்கு ஒன்று அல்லார்க் கன்னன்
எரித்தான் அனல் உடையான் எண் தோளானே
எம்பெருமான் என்று ஏத்தா இலங்கைக் கோனை
நெரித்தானை நெய்த்தானம் மேவி னானை
நினையுமா நினைந்தக்கால் உய்ய லாமே.

திருச்சிற்றம்பலம்