திரு நெய்த்தானம்

            

௨ 

திருநாவுக்கரசர்  சுவாமிகள்   அருளிச்செய்த
ஐந்தாம்  திருமுறை 

தகவல் பலகை	விவரம்
தலம்	திரு நெய்த்தானம்
பிற பெயர்கள்
நாடு	சோழ நாடு (வ)
ॐசுவாமி	நெய்யாடியப்பர்
ॐஅம்பிகை	பாலாம்பிகை
பாடியவர்கள்	சம்பந்தர் (1)          மையாடிய கண்டன் (1-15) அப்பர் (5)          காலனை வீழச் செற்ற (4-37)           பாரிடம் சாடிய பல்லுயிர் (4-89)           கொல்லியான் (5-34)           வாகைஎல்லாம் உடைய (6-41)           மெயத்தானத்து அகம் படியுள் (6-42)
ஸ்தல மரம்	புன்னை
தீர்த்தம்	காவிரி
பண்	திரு குறுந்தொகை
குறிப்புகள்	திருவையாறுக்கு அண்மையில் உள்ளது.  ஏழூர் திருத்தலங்களில் ஒன்று. தில்லை ஸ்தானம் என வழங்கப்படுகிறது
பதிக பலன்	வினை நீங்கும்.
வரிசை எண்.	34                                                     52/63

திருச்சிற்றம்பலம் 

கொல்லி யான்குளிர்தூங்குகுற் றாலத்தான்
புல்லி யார் புரம்  மூன்று எரி செய்தவன்
நெல்லியான் நிலையான நெய்த்தானனைச்
சொல்லி மெய்தொழுவார்சுடர் வாணரே.  1

இரவ னை இடு வெண்தலை ஏந்தியைப்
பரவ னைப்படை யார்மதில் மூன்றையும்
நிரவ னைநிலையானநெய்த் தானனைக்
குரவ னைத்தொழுவார்கொடி வாணரே.  2

ஆனிடை ஐந்தும் ஆடுவர் ஆரிருள்
கானி டைநடம் ஆடுவர் காண்மினோ
தேனி டைமலர் பாயும்  நெய்த் தானனை
வானி டைத்தொழுவார்வலி வாணரே.  3

விண்ட வர்புரம்  மூன்றும் வெண்ணீறு எழக்
கண்ட வன்கடி தாகிய நஞ்சினை
உண்ட வன் ஒளியானநெய்த் தானனைத்
தொண்ட ராய்த்தொழுவார்சுடர் வாணரே.  4

முன்கை நோவக் கடைந்தவர் நிற்கவே
சங்கியாது சமுத்திர நஞ்சு உண்டான்
நங்கை யோடு நவின்றநெய்த் தானனைத்
தங்கை யால் தொழுவார்தலை வாணரே.  5

சுட்ட நீறுமெய் பூசிச் சுடலையுள்
நட்ட மாடுவர் நள்ளிள்  பேயொடே
சிட்டர் வானவர் தேரு நெய்த் தானனை
இட்ட மாய்த்தொழுவார் இன்ப வாணரே.  6

கொள்ளித் தீ எரி வீசிக் கொடியதோர்
கள்ளிக் காட்டிடையாடுவர் காண்மினோ
தெள்ளித் தேறித் தெளிந்துநெய்த் தானனை
உள்ளத் தால் தொழுவார் உம்பர் வாணரே.  7

உச்சி மேல்விளங்கும் இள வெண்பிறை
பற்றி ஆடரவோடும் சடைப்பெய்தான்
நெற்றி யார் அழல் கண்டநெய்த் தானனைச்
சுற்றி மெய்தொழுவார்சுடர் வாணரே.  8

மாலொ டும்மறை ஓதிய நான்முகன்
காலொ டும்முடிகாண்பரி தாயினான்
சேலொ டும் செருச்செய்யும்நெய்த் தானனை
மாலொ டும் தொழுவார்வினை வாடுமே.  9

வலிந்த தோள்வலி வாள் அரக்கன் தனை
நெருங்க நீள்வரை யூன்றுநெய்த் தானனார்
புரிந்து கைந் நரம்போடு இசை பாடலும்
பரிந்த னைப்பணிவார்வினை பாறுமே.

திருச்சிற்றம்பலம்