திரு நாரையூர்

                                                                                 ௨ 

திருநாவுக்கரசு  சுவாமிகள்  அருளிச்செய்த
ஐந்தாம் திருமுறை

தகவல் பலகை	விவரம்
தலம்	திரு நாரையூர்
ஊர்/வேறு பெயர்
நாடு	சோழ (காவிரி வட)
ॐசுவாமி	சௌந்தரநாதர்
ॐஅம்பிகை	திரிபுரசுந்தரி
பாடியவர்கள்	சம்பந்தர் (3)         உரையினில் வந்த (2-86)         காம்பினை வென்ற (3-102)         கடலிடை வெங்கடு (3-107) அப்பர் (2)          வீறு தானுடை வெற்பன் (5-55)         சொல்லானை பொருளானை (6-74) நம்பியாண்டார் நம்பி  (1)         திருநாரையூர் திரு இரட்டை மணிமாலை (11-32)
ஸ்தல மரம்	புன்னாகம்
தீர்த்தம்	காருண்ய தீர்த்தம்
பண்	திருக்குறுந்தொகை
குறிப்புகள்	நாரை வழிபட்டது .  பொல்லாப் பிள்ளையார்  சிறப்புடையது  இவர் உணர்த்தியவாறு நம்பியாண்டார் நம்பிகள் தில்லையில் சேமித்து வைத்திருந்த தேவாரத் திருமுறைகளை உலகிற்கு வெளிப்படுத்தினார்
பதிக பலன்	திருவருள் கிட்டும்
வரிசை எண்.	55                                                            33/63

திருச்சிற்றம்பலம்

வீறு தானுடை வெற்பன் மடந்தையோர்
கூற னாகிலும்  கூன்பிறை சூடிலும்
நாறு பூம்பொழில் நாரையூர் நம்பனுக்கு
ஆறு சூடலும் அம்ம அழகிதே.  1

புள்ளி கொண்ட புலி உரி ஆடையும்
வெள்ளி கொண்டவெண் பூதிமெய் யாடலும்
நள்ளி தெண்டிரை நாரையூ ரான் நஞ்சை
அள்ளி உண்டலும் அம்ம அழகிதே.  2

வேடு தங்கிய வேடமும் வெண்தலை
ஓடு தங்கியவுண்பலி கொள்கையும்
நாடு தங்கிய நாரையூ ரான்நடம்
ஆடு பைங்கழல் அம்ம அழகிதே.  3

கொக்கின் தூவலும் கூவிளம் கண்ணியும்
மிக்க வெண்டலை மாலை விரிசடை
நக்க னாகிலும் நாரையூர் நம்பனுக்கு
அக்கின் ஆரமும் அம்ம அழகிதே.  4

வடிகொள் வெண்மழு மான் அமர் கைகளும்
பொடிகொள் செம்பவளம்புரை மேனியும்
நடிகொள் நன்மயில் சேர்திரு நாரையூர்
அடிகள் தம்வடிவு அம்ம அழகிதே.  5

சூலம் மல்கிய கையும் சுடரொடு
பாலும் நெய் தயிர் ஆடிய பான்மையும்
ஞாலம் மல்கிய நாரையூர் நம்பனுக்கு
ஆல நீழலும் அம்ம அழகிதே.  6 

பண்ணி னால் மறை பாடலோடு ஆடலும்
எண்ணி லார்புரம்  மூன்று எரி செய்ததும்
நண்ணி னார்துயர் தீர்த்தலும் நாரையூர்
அண்ண லார்செய்கை அம்ம அழகிதே.  7

என்பு பூண்டு எருது ஏறி இளம்பிறை
மின்பு ரிந்த சடைமேல் விளங்கவே
நன்ப கற்பலி தேரினும் நாரையூர்
அன்ப னுக்கது அம்ம அழகிதே.  8

முரலும் கின்னரம் மொந்தை முழங்கவே
இரவில் நின்று எரியாடலும் நீடுலாம்
நரலும் வாரிநல் நாரையூர் நம்பனுக்கு
அரவும் பூணுதல் அம்ம அழகிதே.  9

கடுக்கை அம் சடையன் கயி லைம்மலை
எடுத்த வாளரக்கன் தலை ஈர் ஐஞ்சும்
நடுக்கம் வந்திற நாரையூ ரான்விரல்
அடுத்த தன்மையும் அம்ம அழகிதே.  10

திருச்சிற்றம்பலம்