திரு நாரையூர்

                                                                                ௨ 

திருஞானசம்பந்தர் சுவாமிகள்  அருளிச்செய்த
மூன்றாம்  திருமுறை

தகவல் பலகை	விவரம்
தலம்	திரு நாரையூர்
ஊர்/வேறு பெயர்
நாடு	சோழ (காவிரி வட)
ॐசுவாமி	சௌந்தரநாதர்
ॐஅம்பிகை	திரிபுரசுந்தரி
பாடியவர்கள்	சம்பந்தர் (3)         உரையினில் வந்த (2-86)         காம்பினை வென்ற (3-102)         கடலிடை வெங்கடு (3-107) அப்பர் (2)          வீறு தானுடை வெற்பன் (5-55)         சொல்லானை பொருளானை (6-74) நம்பியாண்டார் நம்பி  (1)         திருநாரையூர் திரு இரட்டை மணிமாலை (11-32)
ஸ்தல மரம்	புன்னாகம்
தீர்த்தம்	காருண்ய தீர்த்தம்
பண்	பியந்தைக் காந்தாரம்
குறிப்புகள்	நாரை வழிபட்டது .  பொல்லாப் பிள்ளையார்  சிறப்புடையது  இவர் உணர்த்தியவாறு நம்பியாண்டார் நம்பிகள் தில்லையில் சேமித்து வைத்திருந்த தேவாரத் திருமுறைகளை உலகிற்கு வெளிப்படுத்தினார்
பதிக பலன்	கடல் போன்ற பெரும் துன்பமும் விலகிடும்.
வரிசை எண்.	107                                                            33/63

திருச்சிற்றம்பலம்

கடலிடை வெங்கடு நஞ்சம் உண்ட 
          கடவுள் விடையேறி
உடலிடை யிற்பொடிப் பூசவல்லான் 
          உமையோடு ஒருபாகன்
அடலிடை யிற்சிலை தாங்கி எய்த 
          அம்மான் அடியார்மேல்
நடலைவி னைத்தொகை தீர்த்து 
          உகந்தானிடம் நாரையூர்தானே.  1

விண்ணின்மின் னேர்மதி துத்திநாகம் 
          விரிபூ மலர்க்கொன்றை
பெண்ணின்முன் னேமிக வைத்து உகந்த 
          பெருமான் எரி ஆடி
நண்ணிய தன்னடி யார்களோடும் 
          திருநாரை யூரான் என்று
எண்ணுமின் நும்வினை போகும்வண்ணம் 
          இறைஞ்சும் நிறைவாமே.  2

தோடு ஒரு காது ஒரு காதுசேர்ந்த 
          குழையான் இழைதோன்றும்
பீடு ஒரு கால்பிரி யாதுநின்ற 
          பிறையான் மறை ஓதி
நாடொரு காலமும் சேரநின்ற 
          திருநாரை யூரானைப்
பாடுமின் நீர்பழி போகும்வண்ணம் 
          பயிலும் உயர்வாமே.  3

வெண்ணிலவு அம்சடை சேர வைத்து 
          விளங்கும் தலையேந்திப்
பெண்ணில் அமர்ந்து ஒரு கூறதாய 
          பெருமான் அருளார்ந்த
அண்ணல்மன் னியுறை கோயிலாகும் 
          அணிநாரை யூர்தன்னை
நண்ணல் அமர்ந்து உறை வாக்குமின்கள் 
          நடலை கரிசு அறுமே.  4

வானமர் தீவளி நீர்நிலனாய் 
          வழங்கும் பழியாகும்
ஊனமர் இன்னுயிர் தீங்கு குற்றம் 
          உறைவாற் பிறிது இன்றி
நானம ரும்பொரு ளாகிநின்றான் 
          திருநாரை யூர் எந்தை
கோன் அவனைக் குறுகக்குறுகா 
          கொடுவல் வினைதானே.  5

கொக்கிறகும் குளிர் சென்னி மத்தம்
          குலாய மலர்சூடி
அக்கு அரவோடு அரையார்த்து உகந்த 
          அழகன் குழகாக
நக்கமரும் திரு மேனியாளன் 
          திருநாரை யூர்மேவிப்
புக்கம ரும்மனத் தோர்கள்தம்மைப் 
          புணரும் புகல்தானே  6

ஊழியும் இன்பமும் காலமாகி 
          உயரும் தவமாகி
ஏழிசை யின்பொருள் வாழும்வாழ்க்கை 
          வினையின் புணர்ப்பாகி
நாழிகை யும்பல ஞாயிறாகி 
          நளிர்நாரை யூர்தன்னில்
வாழியர் மேதகு மைந்தர்செய்யும் 
          வகையின் விளைவாமே.  7

கூசம் இலாத அரக்கன்வரையைக் 
          குலுங்க எடுத்தான் தோள்
நாசம தாகி இறஅடர்த்த 
          விரலான் கரவாதார்
பேசவி யப்பொடு பேணநின்ற 
          பெரியோன் இடம்போலும்
தேசமு றப்புகழ் செம்மைபெற்ற 
          திருநாரை யூர்தானே.  8

பூமக னும் அவனைப்பயந்த 
          புயலார் நிறத்தானும்
ஆமளவும் திரிந்து ஏத்திக் காண்டல் 
          அறிதற்கு அரியான் ஊர்
பாமரு வும் குணத்தோர்கள் ஈண்டிப் 
          பலவும் பணிசெய்யும்
தேமரு வும் திகழ் சோலைசூழ்ந்த 
          திருநாரை யூர்தானே.  9

வெற்றரை யாகிய வேடம் காட்டித் 
          திரிவார் துவர் ஆடை
உற்றரை யோர்கள் உரைக்கும் சொல்லை 
          உணராது எழுமின்கள்
குற்றம் இலாததோர் கொள்கை எம்மான் 
          குழகன் தொழிலாரப்
பெற்றர வாட்டி வரும்பெருமான் 
          திருநாரை யூர்சேர்வே.  10

பாடியலும் திரை சூழ்புகலித் 
          திருஞான சம்பந்தன்
சேடிய லும்புகழ் ஓங்கு செம்மைத் 
          திருநாரை யூரான்மேற்
பாடிய தண் தமிழ் மாலைபத்தும் 
          பரவித் திரிந்தாக
வாடிய சிந்தையி னார்க்குநீங்கும் 
          அவலக் கடல்தானே.  11

திருச்சிற்றம்பலம்