திரு நாரையூர்

                                                                              ௨ 

திருஞான சம்பந்த சுவாமிகள்  அருளிச்செய்த
இரண்டாம்  திருமுறை

தகவல் பலகை	விவரம்
தலம்	திரு நாரையூர்
ஊர்/வேறு பெயர்
நாடு	சோழ (காவிரி வட)
ॐசுவாமி	சௌந்தரநாதர்
ॐஅம்பிகை	திரிபுரசுந்தரி
பாடியவர்கள்	சம்பந்தர் (3)         உரையினில் வந்த (2-86)         காம்பினை வென்ற (3-102)         கடலிடை வெங்கடு (3-107) அப்பர் (2)          வீறு தானுடை வெற்பன் (5-55)         சொல்லானை பொருளானை (6-74) நம்பியாண்டார் நம்பி  (1)         திருநாரையூர் திரு இரட்டை மணிமாலை (11-32)
ஸ்தல மரம்	புன்னாகம்
தீர்த்தம்	காருண்ய தீர்த்தம்
பண்	பியந்தைக் காந்தாரம்
குறிப்புகள்	நாரை வழிபட்டது .  பொல்லாப் பிள்ளையார்  சிறப்புடையது  இவர் உணர்த்தியவாறு நம்பியாண்டார் நம்பிகள் தில்லையில் சேமித்து வைத்திருந்த தேவாரத் திருமுறைகளை உலகிற்கு வெளிப்படுத்தினார்
பதிக பலன்	பொருளும் அருளும் பெற்று செம்மையாக வாழ்வர்
வரிசை எண்.	86                                                             33/63

திருச்சிற்றம்பலம்

உரையினில் வந்தபாவம் உணர்நோய்க ளும்
          செயல்தீங்கு குற்றம் உலகில்
வரையினி லாமைசெய்த அவைதீரும் வண்ணம்
          மிக ஏத்தி நித்தம் நினைமின்
வரைசிலை யாகஅன்று மதில்மூன்று எரித்து
          வளர்கங்குல் நங்கை வெருவத்
திரை ஒலி நஞ்சம் உண்ட சிவன்மேய செல்வத்
          திருநாரை யூர்கை தொழவே.  1

ஊனடை கின்றகுற்றம்  முதலாகி உற்ற
          பிணிநோய் ஒருங்கும் உயரும்
வான் அடைகின்ற வெள்ளை மதிசூடு சென்னி
          விதியான வேத விகிர்தன்
கானிடை ஆடிப்பூதப் படையான் இயங்கு
          விடையான் இலங்கு முடிமேல்
தேனடை வண்டுபாடு சடை அண்ணல் நண்ணு
          திருநாரை யூர் கைதொழவே.  2

ஊரிடை நின்றுவாழும் உயிர்செற்ற காலன்
          துயருற்ற தீங்கு விரவிப்
பாரிடை மெள்ளவந்து பழியுற்ற வார்த்தை
          ஒழிவுற்ற வண்ணம் அகலும்
போரிடை அன்றுமூன்று மதில் எய்த ஞான்று
          புகழ்வானு ளோர்கள் புணரும்
தேரிடை நின்றஎந்தை பெருமான் இருந்த
          திருநாரை யூர்கை தொழவே.  3

தீயுற வாய ஆக்கை அதுபற்றி வாழும்
          வினைசெற்ற உற்ற உலகின்
தாயுறு தன்மையாய தலைவன் தன் நாமம்
          நிலையாக நின்று மருவும்
பேயுற வாயகானில் நடமாடி கோல
          விடம் உண்ட கண்டன் முடிமேல்
தேய்பிறை வைத்து உகந்த சிவன்மேய செல்வத்
          திருநாரை யூர்கை தொழவே.  4

வசையப ராதமாய உவரோதம் நீங்கும்
          தவமாய தன்மை வரும்வான்
மிசையவர் ஆதியாய திருமார்பு இலங்கு
          விரிநூலர் விண்ணும் நிலனும்
இசையவர் ஆசிசொல்ல இமையோர்கள் ஏத்தி
          அமையாத காத லொடுசேர்
திசையவர் போற்ற நின்ற சிவன்மேய செல்வத்
          திருநாரை யூர்கை தொழவே.  5

உறைவளர் ஊன்நிலாய உயிர்நிற்கும் வண்ணம்
          உணர்வாக்கும் உண்மை உலகில்
குறை உளவாகி நின்ற குறைதீர்க்கு நெஞ்சில்
          நிறைவாற்று நேசம் வளரும்
மறைவளர் நாவன் மாவின் உரிபோர்த்த மெய்யன்
          அரவார்த்த அண்ணல் கழலே
திறைவளர் தேவர்தொண்டின் அருள்பேண நின்ற
          திருநாரை யூர்கை தொழவே.  6

தனம்வரும் நன்மையாகும்  தகுதிக் குழந்து
          வருதிக் குழன்ற உடலின்
இனம்வளர் ஐவர்செய்யும் வினையங்கள் செற்று
          நினைவு ஒன்று சிந்தை பெருகும்
முனம் ஒரு காலம்மூன்று புரம்வெந்து மங்கச்
          சரமுன்று எரிந்த அவுணர்
சினம் ஒரு கால் அழித்த சிவன்மேய செல்வத்
          திருநாரை யூர்கை தொழவே.  7

உருவரை கின்றநாளில் உயிர்கொள்ளும்  கூற்றம்
          நனி அஞ்சும் ஆதல் உறநீர்
மருமலர் தூவி என்றும் வழிபாடு செய்மின்
          அழிபாடு இலாத கடலின்
அருவரை சூழ் இலங்கை அரையன் தன் வீரம்
          அழியத் தடக்கை முடிகள்
திருவிரல் வைத்து உகந்த சிவன்மேய செல்வத்
          திருநாரை யூர்கை தொழவே.  8

வேறுயர் வாழ்வுதன்மை வினைதுக்கம் மிக்க
          பகைதீர்க்கு மேய உடலில்
தேறிய சிந்தைவாய்மை தெளிவிக்க நின்ற
          கரவைக் கரந்து திகழும்
சேறுயர் பூவின்மேய பெருமானும் மற்றைத்
          திருமாலும் நேட எரியாய்ச்
சீறிய செம்மையாகும் சிவன்மேய செல்வத்
          திருநாரை யூர்கை தொழவே.  9

மிடைபடு துன்பம் இன்பம் உளதாக்கும் உள்ளம்
          வெளியாக்கு முன்னி உணரும்
படை ஒரு கையில் ஏந்திப் பலிகொள்ளும் வண்ணம்
          ஒலிபாடி ஆடி பெருமை
உடையினை விட்டுளோரும் உடல்போர்த்து ளோரும்
          உரைமாயும் வண்ணம் அழியச்
செடிபட வைத்து உகந்த சிவன்மேய செல்வத்
          திருநாரை யூர்கை தொழவே.  10

எரி ஒரு வண்ணமாய உருவானை எந்தை
          பெருமானை உள்கி நினையார்
திரிபுரம் அன்றுசெற்ற சிவன்மேய செல்வத்
          திருநாரை யூர்கை தொழுவான்
பொருபுனல் சூழ்ந்தகாழி மறைஞான பந்தன்
          உரைமாலை பத்தும் மொழிவார்
திருவளர் செம்மையாகி அருள்பேறு மிக்கது 
          உளது என்பர் செம்மை யினரே.  11

திருச்சிற்றம்பலம்