திரு கச்சி ஏகம்பம்

   

௨ 

திருநாவுக்கரசு சுவாமிகள் அருளிச்செய்த
ஐந்தாம்   திருமுறை 

தகவல் பலகை	விவரம்
தலம்	திரு கச்சி ஏகம்பம்
ஊர்	காஞ்சிபுரம், காமபீடம், மும்மூர்த்தி வாசம், சிவபுரம், விண்டுபுரம், தபோமயம், துண்டீரபுரம், பிரமபுரம், பூலோக கயிலாயம், தேவபுரம், சகலசித்திபுரம், புவனசாரம், ஆதிபீடம், கன்னிகாப்பு, கலிசித்து, கச்சி
நாடு	தொண்டை நாடு
ॐசுவாமி	ஏகாம்பர நாதர், திருவேகம்பர்
ॐஅம்பிகை	ஏலவார் குழலி, காமாட்சி அம்மை
பாடியவர்கள்	சம்பந்தர் (4)         வெந்த வெண் பொடி பூசு  (1-133)         மறையானை மாசிலா (2-12)         கருவா கச்சி திருவேகம்பம் (3-41)         பாயுமால் விடை (3-114) அப்பர் (7)         கரவாடும் வன்னம்(4-07)         நம்பனை நகர மூன்றும் (4-44)          ஓதுவித்தாய் முன் (4-99)         பண்டு செய்த பழ வினை (5-047)         பூ மேலானும் பூமகள் (5-48)         கூற்றுவன் காண் கூற்றுவனை (6-64)         உரித்தவன் காண் உரக்களிற்றை (6-65) சுந்தரர்   (1)         ஆலம் தான் உகந்து அமுது (7-61)
ஸ்தல மரம்	மாமரம்
தீர்த்தம்	கம்பாநதி, சர்வ தீர்த்தம், சிவகங்கை
பண்	காந்தாரம்
குறிப்புகள்	காமாட்சி அம்மை 32 அறங்கள் செய்த தலம்  பஞ்ச பூத தலங்களில் ஒன்று (மண்) கந்தபுராணம் பாடிய கச்சியப்ப சிவாச்சாரியார் வாழ்ந்த தலம்  திருக்குறள் உரை ஆசிரியர் பரிமேலழகர் வாழ்ந்த தலம்  ஐயடிகள் காடவர்கோன், சாக்கிய நாயனார், திருக்குறிப்புத் தொண்டர் பேறு பெற்ற தலம்  சுந்தரமூர்த்தி சுவாமிகள் இடக் கண் பெற்ற தலம்  வேதம் மாமரமாக - தல மரமாக விளங்குவது.  இங்குள்ள மாமரம் சுமார் 3500 ஆண்டுகள் பழமையானது  கம்பாநதி பூமிக்கடியில் கண்களுக்கு புலப்படாதவாறு ஓடுவதாக வரலாறு  நல்ல கம்பன், கள்ளக் கம்பன், வெள்ளக் கம்பன் ஆகிய மூர்த்தங்கள் உள்ள திருத்தலம். முத்தி பேறு தரவல்ல தளமாக போற்றப் படுகிறது .
பதிக பலன்	தீவினைகள் தீரும்
வரிசை எண்.	47                                                      1/32

திருச்சிற்றம்பலம்          

பண்டு செய்த பழவினையின் பயன்
கண்டுங் கண்டுங் களித்திகாண் நெஞ்சமே
வண்டுலா மலர்ச் செஞ்சடை ஏகம்பன்
தொண்டனாய்த் திரியாய்துயர் தீரவே.  1  

நச்சி நாளும் நயந்து அடியார் தொழ
இச்சை யால் உமை நங்கை வழிபடக்
கொச்சை யார்குறு கார்செறி தீம்பொழில்
கச்சி ஏகம்ப மேகை தொழுமினே.  2  

ஊனில் ஆவி  இயங்கி உலகெலாம்
தான் உலாவிய தன்மையர் ஆகிலும்
வான் உலாவிய பாணி பிறங்கவெங்
கானில் ஆடுவர் கச்சி ஏகம்பரே.  3  

இமையா முக்கணர் என்நெஞ்சத்து உள்ளவர்
தமையா ரும் அறிவொண்ணாத் தகைமையர்
இமையோர் ஏத்த இருந்தவன் ஏகம்பன்
நமை ஆளும் அவனைத் தொழு மின்களே.  4  

மருந்தி னோடுநற்சுற்றமும் மக்களும்
பொருந்தி நின்று எனக்காய எம் புண்ணியன்
கருந்த டங்கண்ணினாள் உமை கைதொழ
இருந்த வன்கச்சி ஏகம்பத்து எந்தையே.  5  

பொருளி னோடுநற்சுற்றமும் பற்று இலர்க்கு
அருளும் நன்மை தந்தாய அரும்பொருள்
சுருள்கொள் செஞ்சடையான்கச்சி யேகம்பம்
இருள்கெடச் சென்றுகைதொழுது ஏத்துமே.  6  

மூக்கு வாய்செவிகண்ணு உடல் ஆகி வந்து 
ஆக்கும் ஐவர்தம் ஆப்பை அவிழ்த்து அருள்
நோக்கு வான்நமை நோய்வினை வாராமே
காக்கும் நாயகன் கச்சி ஏகம்பனே.  7  

பண்ணில் ஓசைபழத்தினில் இன்சுவை
பெண்ணொடு ஆண் என்று பேசற்கு அரியவன்
வண்ணம் இல்லி வடிவு வேறு ஆயவன்
கண்ணில் உண்மணி கச்சி ஏகம்பனே.  8  

திருவின் நாயகன் செம்மலர் மேலயன்
வெருவ நீண்ட விளங்கு ஒளிச் சோதியான்
ஒருவனாய் உணர்வாய் உணர்வு அல்லதோர்
கருவுள் நாயகன் கச்சி ஏகம்பனே.  9  

இடுகு நுண்ணிடை ஏந்திள மென்முலை
வடிவின் மாதர் திறம்மனம் வையன்மின்
பொடிகொள் மேனியன் பூம்பொழில் கச்சியுள்
அடிகள் எம்மை அருந்துயர் தீர்ப்பரே.  10  

இலங்கை வேந்தன் இராவணன் சென்றுதன்
விலங்க லை எடுக்க அவ்விரல் ஊன்றலும்
கலங்கிக் கச்சி ஏகம்பவோ என்றலும்
நலங்கொள் செலவளித்தான் எங்கள் நாதனே.

திருச்சிற்றம்பலம்