திரு கச்சி ஏகம்பம்

௨ 

திருநாவுக்கரசு சுவாமிகள் அருளிச்செய்த
ஆறாம்    திருமுறை 

தகவல் பலகை	விவரம்
தலம்	திரு கச்சி ஏகம்பம்
ஊர்	காஞ்சிபுரம், காமபீடம், மும்மூர்த்தி வாசம், சிவபுரம், விண்டுபுரம், தபோமயம், துண்டீரபுரம், பிரமபுரம், பூலோக கயிலாயம், தேவபுரம், சகலசித்திபுரம், புவனசாரம், ஆதிபீடம், கன்னிகாப்பு, கலிசித்து, கச்சி
நாடு	தொண்டை நாடு
ॐசுவாமி	ஏகாம்பர நாதர், திருவேகம்பர்
ॐஅம்பிகை	ஏலவார் குழலி, காமாட்சி அம்மை
பாடியவர்கள்	சம்பந்தர் (4)         வெந்த வெண் பொடி பூசு  (1-133)         மறையானை மாசிலா (2-12)         கருவா கச்சி திருவேகம்பம் (3-41)         பாயுமால் விடை மேல் ஒரு  அப்பர் (7)         கரவாடும் வன்னம்(4-07)         நம்பனை நகர மூன்றும் (4-44)          ஓதுவித்தாய் முன் (4-99)         பண்டு செய்த பழ வினை (5-047)         பூ மேலானும் பூமகள் (5-48)         கூற்றுவன் காண் கூற்றுவனை (6-64)         உரித்தவன் காண் உரக்களிற்றை (6-65) சுந்தரர்   (1)         ஆலம் தான் உகந்து அமுது (7-61)
ஸ்தல மரம்	மாமரம்
தீர்த்தம்	கம்பாநதி, சர்வ தீர்த்தம், சிவகங்கை
பண்	திருக்குறுந்தொகை
குறிப்புகள்	காமாட்சி அம்மை 32 அறங்கள் செய்த தலம்  பஞ்ச பூத தலங்களில் ஒன்று (மண்) கந்தபுராணம் பாடிய கச்சியப்ப சிவாச்சாரியார் வாழ்ந்த தலம்  திருக்குறள் உரை ஆசிரியர் பரிமேலழகர் வாழ்ந்த தலம்  ஐயடிகள் காடவர்கோன், சாக்கிய நாயனார், திருக்குறிப்புத் தொண்டர் பேறு பெற்ற தலம்  சுந்தரமூர்த்தி சுவாமிகள் இடக் கண் பெற்ற தலம்  வேதம் மாமரமாக - தல மரமாக விளங்குவது.  இங்குள்ள மாமரம் சுமார் 3500 ஆண்டுகள் பழமையானது  கம்பாநதி பூமிக்கடியில் கண்களுக்கு புலப்படாதவாறு ஓடுவதாக வரலாறு  நல்ல கம்பன், கள்ளக் கம்பன், வெள்ளக் கம்பன் ஆகிய மூர்த்தங்கள் உள்ள திருத்தலம். முத்தி பேறு தரவல்ல தளமாக போற்றப் படுகிறது .
பதிக பலன்	தீவினைகள் தீரும்
வரிசை எண்.	48                                                      1/32

திருச்சிற்றம்பலம்          

கூற்றுவன்காண் கூற்றுவனைக் குமைத்த கோன்காண்
குவலயன்காண் குவலயத்தின் நீரா னான்காண்
காற்றவன்காண் கனலவன்காண் கலிக்கும் மின்காண்
கனபவளச் செம்மேனி கலந்த வெள்ளை
நீற்றவன்காண் நிலாவூரும் சென்னி யான்காண்
நிறையார்ந்த புனற்கங்கை நிமிர்ச டைமேல்
ஏற்றவன்காண் எழிலாரும் பொழிலார் கச்சி 
ஏகம்பன் காண் அவன் எண்ணத் தானே.  1  

பரந்தவன்காண் பல் உயிர்க ளாகி எங்கும்
பணிந்து எழுவார் பாவமும் வினையும் போகத்
துரந்தவன்காண் தூமலரங் கண்ணி யான்காண்
தோற்ற நிலை இறுதிப் பொருளாய் வந்த
மருந்தவன்காண் வையங்கள் பொறைதீர்ப் பான்காண்
மலர்தூவி நினைந்து எழுவார் உள்ளம் நீங்காது 
இருந்தவன்காண் எழிலாரும் பொழிலார் கச்சி 
ஏகம்பன் காண் அவன் எண்ணத் தானே.  2  

நீற்றவன்காண் நீராகித் தீயா னான்காண்
நிறைமழுவும் தமருகமும் எரியும் கையில்
தோற்றவன்காண் தோற்றக் கேடில்லா தான்காண்
துணையிலிகாண் துணை என்று தொழுவார் உள்ளம்
போற்றவன்காண் புகழ்கள்தமைப் படைத்தான் தான்காண்
பொறியரவும் விரிசடைமேற் புனலும் கங்கை
ஏற்றவன்காண் எழிலாரும் பொழிலார் கச்சி 
ஏகம்பன் காண் அவன் எண்ணத் தானே.  3  

தாயவன்காண் உலகிற்குத் தன் ஒப்பில்லாத் 
தத்துவன்காண் மலைமங்கை பங்கா என்பார்
வாயவன்காண் வரும்பிறவி நோய்தீர்ப் பான்காண்
வானவர்க்கும் தானவர்க்கும் மண்ணு ளோர்க்குஞ்
சேயவன்காண் நினைவார்க்குச் சித்த மாரத் 
திருவடியே உள்கிநினைந்து எழுவார் உள்ளம்
ஏயவன்காண் எழிலாரும் பொழிலார் கச்சி 
ஏகம்பன் காண் அவன் எண்ணத் தானே.  4  

 அழித்தவன்காண் எயில்மூன்றும் அயில்வாய் அம்பால்
ஐயாறும் இடைமருதும் ஆள்வான் தான்காண்
பழித்தவன்காண் அடையாரை அடைவார் தங்கள் 
பற்றவன்காண் புற்று அரவ நாணி னான்காண்
சுழித்தவன்காண் முடிக்கங்கை அடியே போற்றும் 
தூயமா முனிவர்க்காப் பார்மேல் நிற்க
இழித்தவன்காண் எழிலாரும் பொழிலார் கச்சி 
ஏகம்பன் காண் அவன் எண்ணத் தானே.  6 

 அசைந்தவன்காண் நடமாடிப் பாடல் பேணி
அழல்வண்ணத்தில் அடியும் முடியும் தேடப்
பசைந்தவன்காண் பேய்க்கணங்கள் பரவி ஏத்தும் 
பான்மையன்காண் பரவிநினைந்து எழுவார் தம்பால்
கசிந்தவன்காண் கரியின் உரி போர்த்தான் தான்காண்
கடலில்விடம் உண்ட அமரர்க்கு அமுதம் ஈய
இசைந்தவன்காண் எழிலாரும் பொழிலார் கச்சி 
ஏகம்பன் காண் அவன் எண்ணத் தானே.  7  

முடித்தவன்காண் வன்கூற்றைச் சீற்றத் தீயால் 
வலியார்தம் புரமூன்றும் வேவச் சாபம்
பிடித்தவன்காண் பிஞ்ஞகனாம் வேடத் தான்காண்
பிணையல்வெறி கமழ்கொன்றை அரவு சென்னி
முடித்தவன்காண் மூவிலைநல் வேலி னான்காண்
முழங்கி உரும் எனத்தோன்று மழையாய் மின்னி
இடித்தவன்காண் எழிலாரும் பொழிலார் கச்சி 
ஏகம்பன் காண் அவன் எண்ணத் தானே.  8  

வருந்தவன்காண் மனமுருகி நினையா தார்க்கு 
வஞ்சகன்காண் அஞ்செழுத்து நினைவார்க்கு என்றும்
மருந்தவன்காண் வான்பிணிகள் தீரும் வண்ணம்
வானகமும் மண்ணகமும் மற்று மாகிப்
பரந்தவன்காண் படர்சடை எட்டு உடையான் தான்காண்
பங்கயத்தோன் தன்சிரத்தை ஏந்தி ஊரூர்
இரந்தவன்காண் எழிலாரும் பொழிலார் கச்சி 
ஏகம்பன் காண் அவன் எண்ணத் தானே.  9  

வெம்மான உழுவை அதள் உரிபோர்த் தான்காண்
வேதத்தின் பொருளான்காண் என்று இயம்பி
விம்மாநின் றழுவார்கட்கு அளிப்பான் தான்காண்
விடையேறித் திரிவான்காண் நடம் செய் பூதத்து 
அம்மான்காண் அகலிடங்கள் தாங்கி னான்காண்
அற்புதன்காண் சொற்பதமும் கடந்து நின்ற
எம்மான்காண் எழிலாரும் பொழிலார் கச்சி 
ஏகம்பன் காண் அவன் எண்ணத் தானே.  10  

அறுத்தான்காண் அயன்சிரத்தை அமரர் வேண்ட
ஆழ்கடலின் நஞ்சு உண்டங் கணிநீர்க் கங்கை
செறுத்தான்காண் தேவர்க்கும் தேவன் தான்காண்
திசை அனைத்தும் தொழுது ஏத்தக் கலைமான் கையிற்
பொறுத்தான்காண் புகலிடத்தை நலிய வந்து 
பொருகயிலை எடுத்தவன் தன் முடிதோள் நாலஞ்
சிறுத்தான்காண் எழிலாரும் பொழிலார் கச்சி 
ஏகம்பன் காண் அவன் எண்ணத் தானே.

திருச்சிற்றம்பலம்