திரு பழனம்

௨ 

திருஞானசம்பந்தர் சுவாமிகள்   அருளிச்செய்த
முதலாம்   திருமுறை 

தகவல் பலகை	விவரம்
தலம்	திருப்பழனம்
பிற பெயர்கள்
நாடு	சோழ நாடு (வ)
ॐசுவாமி	ஆபத்சகாயர்
ॐஅம்பிகை	பெரியநாயகி
பாடியவர்கள்	சம்பந்தர் (1)         வேதம் ஓதி  (1-67) அப்பர் (5)         சொல் மாலை பயில்கின்ற (4-12)         ஆடினார் ஒருவர் (4-36)         மேவித்து நின்று (4-87)         அருவானாய் அத்தி (5-35)         அலையார் கடல் நஞ்சம் (6-36)
ஸ்தல மரம்	வாழை
தீர்த்தம்	காவிரி, மங்கள தீர்த்தம்
பண்	தக்கேசி
குறிப்புகள்	கதலி வனம் என பெயர் பெற்றது  திருவையாற்றை மையமாக கொண்ட ஏழூர் திருத்தலங்களில் ஒன்று. சந்திரன் வழிபட்ட தலம்.
பதிக பலன்	நல்லவராய் விளங்குவர்.
வரிசை எண்.	67                                                     50/63

திருச்சிற்றம்பலம் 

வேதம் ஓதி வெண்ணூல்பூண்டு 
          வெள்ளை எருது ஏறிப்
பூதம் சூழப் பொலியவருவார் 
          புலியின் உரிதோலார்
நாதா எனவும் நக்கா எனவும் 
          நம்பா எனநின்று
பாதம் தொழுவார் பாவம் தீர்ப்பார் 
          பழன நகராரே.  1

கண்மேல் கண்ணும்  சடைமேல் பிறையும் 
          உடையார் காலனைப்
புண்ணாறுதிரம் எதிர் ஆறு ஓடப் 
          பொன்றப்புறம்  தாளால்
எண்ணாது உதைத்த எந்தைபெருமான் 
          இமவான் மகளோடும்
பண்ணார் களிவண்டு அறை பூஞ்சோலைப் 
          பழன நகராரே.  2

பிறையும்புனலும்  சடைமேல் உடையார் 
          பறைபோல் விழிகட்பேய்
உறையுமயானம் இடமா உடையார் 
          உலகர் தலைமகன்
அறையும் மலர்கொண்டு அடியார்பரவி 
          ஆடல் பாடல்செய்
பறையும் சங்கும் பலியும்ஓவாப் 
          பழன நகராரே.  3

உரமன்னுயர் கோட்டு உலறு கூகை 
          அலறும் மயானத்தில்
இரவில் பூதம் பாடஆடி 
          எழிலார் அலர் மேலைப்
பிரமன்தலையின் நறவம் ஏற்ற 
          பெம்மான் எமை ஆளும்
பரமன்பகவன் பரமேச்சுவரன் 
          பழன நகராரே.  4

குலவெஞ்சிலையால் மதில்மூன்று எரித்த 
          கொல் ஏறுடை அண்ணல்
கலவ மயிலும் குயிலும்பயிலும் 
          கடல்போல் காவேரி
நலமஞ்சுடைய நறுமாங்கனிகள் 
          குதிகொண்டு எதிர் உந்திப்
பலவின்கனிகள் திரைமுன்சேர்க்கும் 
          பழன நகராரே.  5

வீளைக்குரலும் விளிசங்கு ஒலியும் 
          விழவின் ஒலி ஓவா
மூளைத்தலைகொண்டு அடியார் ஏத்தப் 
          பொடியா மதிள் எய்தார்
ஈளைப்படுகில் இலை ஆர் தெங்கில் 
          குலையார் வாழையின்
பாளைக்கமுகின் பழம்வீழ்சோலைப் 
          பழன நகராரே.  6

பொய்யாமொழியார் முறையால் ஏத்திப் 
          புகழ்வார் திருமேனி
செய்யார்கரிய மிடற்றார்வெண்ணூல் 
          சேர்ந்த அகலத்தார்
கை ஆடலினார் புனலாய் மல்கு 
          சடைமேற் பிறையோடும்
பையாடு அரவம் உடனேவைத்தார் 
          பழன நகராரே.  7

மஞ்சோங்கு உயரம் உடையான்மலையை 
          மாறா எடுத்தான்தோள்
அஞ்சோடு அஞ்சும் ஆறுநான்கும் 
          அடர ஊன்றினார்
நஞ்சார்சுடலைப் பொடிநீறு அணிந்த 
          நம்பால்  வம்பு ஆரும்
பைந்தாமரைகள் கழனிசூழ்ந்த 
          பழன நகராரே.  8

கடியார்கொன்றைச் சுரும்பின்மாலை 
          கமழ்புன் சடையார்விண்
முடியாப்படிமூ வடியாl உலக 
          முழுதும் தாவிய
நெடியான்நீள்தா மரைமேல் அயனும் 
          நேடிக் காணாத
படியார்பொடியாடு அகலம் உடையார் 
          பழன நகராரே.  9

கண் தான் கழுவா முன்னே ஓடிக் 
          கலவைக் கஞ்சியை
உண்டு ஆங்கு அவர்கள் உரைக்கும் சிறுசொல் 
          ஓரார் பாராட்ட
வண் தாமரையின் மலர்மேல் நறவ 
          மதுவாய் மிகவுண்டு
பண் தான் கெழும வண்டியாழ்செய்யும்
           பழன நகராரே.  10

வேய்முத்து ஓங்கி விரைமுன்பரக்கும் 
          வேணுபுரம் தன்னுள்
நா உய்த்து அனைய திறலான்மிக்க 
          ஞான சம்பந்தன்
பேசற்கு இனிய பாடல்பயிலும் 
          பெருமான் பழனத்தை
வாயிற்பொலிந்த மாலை பத்தும் 
          வல்லார் நல்லாரே.

திருச்சிற்றம்பலம்