திரு பழனம்

௨ 

திருநாவுக்கரசு  சுவாமிகள்   அருளிச்செய்த
நான்காம் திருமுறை 

தகவல் பலகை	விவரம்
தலம்	திருப்பழனம்
பிற பெயர்கள்
நாடு	சோழ நாடு (வ)
ॐசுவாமி	ஆபத்சகாயர்
ॐஅம்பிகை	பெரியநாயகி
பாடியவர்கள்	சம்பந்தர் (1)         வேதம் ஓதி  (1-67) அப்பர் (5)         சொல் மாலை பயில்கின்ற (4-12)         ஆடினார் ஒருவர் (4-36)         மேவித்து நின்று (4-87)         அருவானாய் அத்தி (5-35)         அலையார் கடல் நஞ்சம் (6-36)
ஸ்தல மரம்	வாழை
தீர்த்தம்	காவிரி, மங்கள தீர்த்தம்
பண்	திரு நேரிசை
குறிப்புகள்	கதலி வனம் என பெயர் பெற்றது  திருவையாற்றை மையமாக கொண்ட ஏழூர் திருத்தலங்களில் ஒன்று. சந்திரன் வழிபட்ட தலம்.
பதிக பலன்	மகிழ்ச்சியான வாழ்வு கிட்டும்
வரிசை எண்.	36                                                     50/63

திருச்சிற்றம்பலம் 

ஆடினார் ஒருவர் போலும் 
          அலர்கமழ் குழலி னாளைக்
கூடினார் ஒருவர் போலும் 
          குளிர்புனல் வளைந்த திங்கள்
சூடினார் ஒருவர் போலும் 
          தூயநன் மறைகள் நான்கும்
பாடினார் ஒருவர் போலும் 
          பழனத்து எம் பரம னாரே.  1

போவதோர் நெறியும் ஆனார் 
          புரிசடைப் புனித னார்நான்
வேவதோர் வினையிற் பட்டு 
          வெம்மைதான் விடவுங் கில்லேன்
கூவல்தான் அவர்கள் கேளார் 
          குணமிலா ஐவர் செய்யும்
பாவமே தீர நின்றார் 
          பழனத்து எம் பரம னாரே.  2

கண்டராய் முண்டராகிக் 
          கையில் ஓர் கபாலம் ஏந்தித்
தொண்டர்கள் பாடி ஆடித் 
          தொழுகழல் பரம னார்தாம்
விண்டவர் புரங்கள் எய்த 
          வேதியர் வேத நாவர்
பண்டை என் வினைகள் தீர்ப்பார் 
          பழனத்து எம் பரம னாரே.  3

நீரவன் தீயி னோடு 
          நிழலவன் எழில தாய
பாரவன் விண்ணின் மிக்க 
          பரமவன் பரம யோகி
ஆரவன் அண்ட மிக்க 
          திசையினோடு ஒளிக ளாகிப்
பாரகத்து அமிழ்தம் ஆனார் 
          பழனத்து எம் பரம னாரே.  4

ஊழியார் ஊழி தோறும் 
          உலகினுக்கு ஒருவர் ஆகிப்
பாழியார் பாவம்  தீர்க்கும் 
          பராபரர் பரம தாய
ஆழியான் அன்னத் தானும்
          அன்று அவர்க்கு அளப் பரிய
பாழியார் பரவி ஏத்தும் 
          பழனத்து எம் பரம னாரே.  5

ஆலின்கீழ் அறங்கள் எல்லாம் 
          அன்று அவர்க்கு அருளிச் செய்து
நூலின்கீ ழவர்கட்கு எல்லா 
          நுண்பொருள் ஆகி நின்று
காலின்கீழ்க் காலன் தன்னைக் 
          கடுகத்தான் பாய்ந்து பின்னும்
பாலின்கீழ் நெய்யும் ஆனார் 
          பழனத்து எம் பரம னாரே.  6

ஆதித்தன் அங்கி சோமன் 
          அயனொடு மால்பு தனும்
போதித்து நின்று உலகில் 
          போற்றிசைத் தார் இவர்கள்
சோதித்தார் ஏழு உலகும்
          சோதியுட் சோதி யாகிப்
பாதிப்பெண் உருவம் ஆனார் 
          பழனத்து எம் பரம னாரே.  7

காற்றனால் காலல் காய்ந்து 
          கார் உரி போர்த்த ஈசர்
தோற்றனார் கடலுள் நஞ்சைத் 
          தோடுடைக் காதர் சோதி
ஏற்றினார் இளவெண் திங்கள் 
          இரும்பொழில் சூழ்ந்த காயம்
பாற்றினார் வினைகள் எல்லாம் 
          பழனத்து எம் பரம னாரே.  8

கண்ணனும் பிரம னோடு 
          காண்கிலர் ஆகி வந்தே
எண்ணியும் துதித்தும் ஏத்த 
          எரியுரு வாகி நின்று
வண்ணநன் மலர்கள் தூவி 
          வாழ்த்துவார் வாழ்த்தி ஏத்தப்
பண்ணுலாம் பாடல் கேட்டார் 
          பழனத்து எம் பரம னாரே.  9

குடையுடை அரக்கன் சென்று 
          குளிர்கயி லாய வெற்பின்
இடைமட வரலை அஞ்ச 
          எடுத்தலும் இறைவன் நோக்கி
விடையுடை விகிர்தன் தானும் 
          விரலினால் ஊன்றி மீண்டும்
படைகொடை அடிகள் போலும் 
          பழனத்து எம் பரம னாரே.

திருச்சிற்றம்பலம்