திரு பழனம்

   

௨ 

திருநாவுக்கரசு  சுவாமிகள்   அருளிச்செய்த
ஆறாம்  திருமுறை 

தகவல் பலகை	விவரம்
தலம்	திருப்பழனம்
பிற பெயர்கள்
நாடு	சோழ நாடு (வ)
ॐசுவாமி	ஆபத்சகாயர்
ॐஅம்பிகை	பெரியநாயகி
பாடியவர்கள்	சம்பந்தர் (1)         வேதம் ஓதி  (1-67) அப்பர் (5)         சொல் மாலை பயில்கின்ற (4-12)         ஆடினார் ஒருவர் (4-36)         மேவித்து நின்று (4-87)         அருவானாய் அத்தி (5-35)         அலையார் கடல் நஞ்சம் (6-36)
ஸ்தல மரம்	வாழை
தீர்த்தம்	காவிரி, மங்கள தீர்த்தம்
பண்	திரு குருந்தொகை
குறிப்புகள்	கதலி வனம் என பெயர் பெற்றது  திருவையாற்றை மையமாக கொண்ட ஏழூர் திருத்தலங்களில் ஒன்று. சந்திரன் வழிபட்ட தலம்.
பதிக பலன்	சிவ சிந்தனை மிகும்.
வரிசை எண்.	35                                                     50/63

திருச்சிற்றம்பலம் 

அலையார் கடல்நஞ்சம் உண்டார் தாமே
அமரர்களுக்கு அருள்செய்யும் ஆதி தாமே
கொலையாய கூற்றம் உதைத்தார் தாமே
கொல்வேங்கைத் தோல் ஒன்று அசைத்தார் தாமே
சிலையாற் புரம் மூன்று எரித்தார் தாமே
தீநோய் களைந்து என்னை ஆண்டார் தாமே
பலிதேர்ந்து அழகாய பண்பர் தாமே
பழன நகர எம் பிரானார் தாமே.  1

வெள்ளம் ஒரு சடைமேல் ஏற்றார் தாமே
மேலார்கண் மேலார்கண் மேலார் தாமே
கள்ளங் கடிந்து என்னை ஆண்டார் தாமே
கருத்துடைய பூதப் படையார் தாமே
உள்ளத்து உவகை தருவார் தாமே
உறுநோய் சிறுபிணிகள் தீர்ப்பார் தாமே
பள்ளப் பரவை நஞ்சு உண்டார் தாமே
பழன நகர எம் பிரானார் தாமே.  2

இரவும் பகலுமாய் நின்றார் தாமே
எப்போதும் என் நெ ஞ்சத்து உள்ளார் தாமே
அரவம் அரையில் அசைத்தார் தாமே
அனல் ஆடி அங்கை மறித்தார் தாமே
குரவம்  கமழும் குற்றாலர் தாமே
கோலங்கள் மேன்மே லுகப்பார் தாமே
பரவும் அடியார்க்குப் பாங்கர் தாமே
பழன நகர எம் பிரானார் தாமே.  3

மாறின் மதின்மூன்றும் எய்தார் தாமே
வரியரவங் கச்சாக ஆர்த்தார் தாமே
நீறுசேர் திருமேனி நிமலர் தாமே
நெற்றி நெருப்புக்கண் வைத்தார் தாமே
ஏறு கொடுஞ்சூலக் கையார் தாமே
என்பு ஆபரணம் அணிந்தார் தாமே
பார் ஊண் தலையில்  பலியார் தாமே
பழன நகர எம் பிரானார் தாமே.  4

சீரால் வணங்கப் படுவார் தாமே
திசைக்கு எல்லாம்  தேவாகி நின்றார் தாமே
ஆராவமுதம் ஆனார் தாமே
அளவில் பெருமை உடையார் தாமே
நீரார் நியமம் உடையார் தாமே
நீள்வரை வில்லாக வளைத்தார் தாமே
பாரார் பரவப் படுவார் தாமே
பழன நகர எம் பிரானார் தாமே.  5

காலன உயிர் வௌவ வல்லார் தாமே
கடிதோடும் வெள்ளை விடையார் தாமே
கோலம் பலவும் உகப்பார் தாமே
கோள் நாகம்  நாணாகப் பூண்டார் தாமே
நீலம் பொலிந்த மிடற்றார் தாமே
நீள்வரையின உச்சி இருப்பார் தாமே
பால விருத்தரும் ஆனார் தாமே
பழன நகர எம் பிரானார் தாமே.  6

ஏய்ந்த உமைநங்கை பங்கர் தாமே
ஏழ்  ஊழிக்கு அப்புறமாய் நின்றார் தாமே
ஆய்ந்து மலர்தூவ நின்றார் தாமே
அளவில் பெருமை உடையார் தாமே
தேய்ந்த பிறைசடைமேல் வைத்தார் தாமே
தீவாய் அரவு அதனை ஆர்த்தார் தாமே
பாய்ந்த படர்கங்கை ஏற்றார் தாமே
பழன நகர எம் பிரானார் தாமே.  7

ஓராதார் உள்ளத்தில் நில்லார் தாமே
உள்ளூறும் அன்பர் மனத்தார் தாமே
பேராது என் சிந்தை இருந்தார் தாமே
பிறர்க்கு என்றும்  காட்சிக்கு அரியார் தாமே
ஊராரு மூவுலகத்து உள்ளார் தாமே
உலகை நடுங்காமல்  காப்பார் தாமே
பாரார் முழவத் திடையார் தாமே
பழன நகர எம் பிரானார் தாமே.  8

நீண்ட அவர்க்கு ஓர் நெருப்பு உருவம் ஆனார் தாமே
நேரிழையை ஒருபாகம் வைத்தார் தாமே
பூண்டரவைப் புலித்தோல் மேல் ஆர்த்தார் தாமே
பொன் நிறத்த வெள்ளச் சடையார் தாமே
ஆண்டு உலகேழ் அனைத்தினையும் வைத்தார் தாமே
அங்கங்கே சிவமாகி நின்றார் தாமே
பாண்டவரில் பார்த்தனுக்குப் பரிந்தார் தாமே
பழன நகர எம் பிரானார் தாமே.  9

விடை ஏறி வேண்டுலகத்து இருப்பார் தாமே
விரிகதிரோன் சோற்றுத் துறையார் தாமே
புடைசூழத் தேவர் குழாத்தார் தாமே
பூந்துருத்தி நெய்த்தானம் மேயார் தாமே
அடைவே புனல்சூழ் ஐயாற்றார் தாமே
அரக்கனையும் ஆற்றல் அழித்தார் தாமே
படையாப் பல்பூதம் உடையார் தாமே
பழன நகர எம் பிரானார் தாமே.

திருச்சிற்றம்பலம்